Amat-amat na nga ginsuguran ang pagpamalos sang mga campaign materials nga nahamtang sa mga indi designated areas.
Sa interview sang Bombo Radyo Bacolod kay Bacolod Environment and Natural Resources Office Head Ma. Fe Tresfuentes, nagpanaog na ini sang mando sa mga BENRO personnel sa pagbulig sa pagpangbaklas sang mga tarpaulins partikular na sa mga main roads nga covered sang mga street sweepers kasubong man ang ila nga clean and green team.
Pahayag sini nga nagpangabay ang Solid Waste Management Division Region 6 nga tipunon ang mga election materials kag tinguhaan nga marecycle.
Suno diri, una na nga nag-instruction si Bacolod City Lone Distric Congressman-Elect “Albee” Benitez nga ang BENRO ang manguna sa Operation Baklas matapos ang eleksyon.
Panawagan ni Tresfuentes sa mga Barangay nga tipunon ang mga tarpaulins kag iban pa nga election paraphernalias bangod sila ang nagkoordinar na sa recycling plant.
Suno diri, may-ara man sila sang Group Chat para sa 61 ka Punong Barangay sa Bacolod City agud makabulig sa pagpaninlo.
Ginapanawagan man nila nga magbulig ang mga kandidto, nagdaog man ukon napierde sa eleksyon, agud mabalik ang katinlo sang ciudad.
Gina-apresyar man sang BENRO kun may-ara sang mga volunteer groups nga maga-upod sa Operation Baklas.
Suno diri, ipadala ang mga election materials nga mapuslan pa sa mechanical recycling plant, kag pangitaan sang paagi nga mapuslan imbes nga idal-on sa dumpsite.
Isa sa ginatun-an nila nga magamitan sang election materials partikular na ang mga tarpaulins amo ang paghimo sang mga mapuslan sa opening sang klase.
May mga opisina naman sa Bacolod City Government nga una na nga nagpalab-ot nga luyag nila magpangayo sang makolekta nga tarpaulins.
Samtang ang mga kahoy nga kaupod sa mga makuha sa Oplan Baklas ang ginatun-an nga gamiton nga tree guard sa mga ginapatigayon nga tree planting activities.
