Nagahingyo ang pinuno sang Operations Management Unit sa Bacolod sa mga pumuluyo nga sila ang maistorbo kadali bangud pagasiraduhan ang dalan sa CL Montelibano sa adlaw nga patigayunon ang Bar Examination sa University of Saint La Salle.
Nahibaluan nga kahapon, ginpatigayon ang una nga adlaw sang eksaminasyon kun sa diin 169 ka mga bar examinees ang nagkuha.
Bwas nga adlaw, Domingo, patigayunon ang ikaduha nga bahin sang eksaminasyon.
Sa interview sang Bombo Radyo kay Police Lt. Col. Lester Leada, nagahingyo ini sang pag-intindi ang mga pumuluyo bangud sila ang kinahanglan magre-route kag ginadumilian sa pagpamito samtang nagapatigayon ang exam.
Suno diri, alas 8:00 sang aga magasugod ang exam kag sa una nga adlaw, wala sila sang may nabaton nga reklamo kag nagacoordinate man sila sa kun ano ang mga requirements.
Samtang, ginlibot naman sang Negros Occidental Police Provincial Office Bomb Squad ang bilog nga eskwelahan kag sa una nga adlaw, nangin matawhay ang sitwasyon.
Suno kay Lt. Reman Benobo, pinuno sang NOCPPO Bomb Squad, tubtob pa sa Domingo ang ila pagtsekyar kag paglibot sa area.
Suno diri, may yara sila sang duha ka mga K9 dogs nga naglibot kag nagtsekyar agud masiguro ang sitwasyon.
Sa ila assesment, wala man sang may nagluntad nga kamala-malahan.
