Ginalantaw nga ma-umpisahan na sa masunod nga semana ang pagpanagtag sang cash assistance sang Negros Occidental Provincial Government sa mga hog raisers nga napatyan sang baboy bangod sa African Swine Fever (ASF) kag Hog Cholera.
Sa interview sang Bombo Radyo Bacolod kay Negros Occidental Provincial Social Welfare and Development Office (PSWDO) head Chiqui Gonzalez, ang financial assistance ang 1st tranche pa lamang kag sila ang una nga magahatag sa banwa sang San Enrique.
Ang kada hog raisers nga napatyan sang baboy, ano man ini kadamo, ang makabatun sang tag-P2,000 nga cash.
Paathag ni Gonzales nga ginakompleto na lamang nila ang mga dokumento nga ginarequire sang accountant agud makahuman sang payroll gani ginalantaw nga ini ang mapatigayon na sa masunod nga semana.
P4.5 million ang gintalana sang probinsya para sa 1st tranche kag ang listahan ang nakabasi sa reporting sang mga local government units (LGUs).
Nahibaluan nga yara sa P10 million ang gin-alokar sang probinsya para sa nasambitan nga financial assistance.
Apang karun nga nagadugang pa ang report, ginapasalamat naman ni Gonzales nga nagpakita na sang intensyon ang Provincial Government pinaagi kay Negros Occidental Provincial Administrator Atty Rayfrando Diaz nga dugangan ang pondo, inkaso ini ang kulangon.
Samtang, ginapakamaayo naman nila nga mismo sa mga LGUs na patigayunon ang pay-out agud indi na magakinahanglan nga magpadulong pa sa Provincial capitol ang mga benepisyaryo.
