Nagapadayon ang pagpanagtag sang Bacolod City Government sang libre nga school bags sa Kinder, grade school kag highschool.
Sa interview kay Bacolod City Mayor Greg Gasataya, natapos na ang pagpanagtag sang school supplies kag sa karun padayon pa ang ila nga paglibot agud nga magpanagtag sang libre nga school bags.
Ang Elementary ang makabaton sang backpack samtang ang high school ang makabaton sang sling bag kag kalakip na sa ginapanagtag ang P.E tshirt.
Suno kay Gasataya ginalauman sa matapos na sa madason nga semana ang pagnagtag sang bags kalakip na ang mga P.E tshirts sa mga pampubliko nga eskwelahan sa ciudad.
Ang pagpanagtag sang P.E uniforms ang medyo nagakadugayan bangud kinahanglan sang sortings nakadepende sa ginhatag sang mga eskwelahan nga data sang mga estudyante.
Nagdangat na sa kapin 40 porsyento sang mga public schools ang nalibot kag nahatagan sang libre nga school bags kag P.E uniforms.
Nagapadayon pa ang pagproseso sang mga dokyumento para sa mga school supplies nga ipanagtag sa mga estudyante sang Negros Occidental High School nga residente sang ciudad sang Bacolod.
Una na nga gin-emphasize ni Bacolod City Administrator Atty. Mark Steven Mayo nga ang pondo nga gingamit sa procurement ang indi halin sa Special Education Fund (SEF) bangud ang nasambit nga pondo ang para lamang sa DepEd Division of Bacolod City.
