Ginpatigayon ang kick-off ceremony sa Rizal Elementary School para sa pagpanagtag sang libre nga school supplies sang Bacolod City Government kaina sang aga.
Sa interview sang Bombo Radyo Bacolod kay City Councilor Al Victor Espino, chairperson sang Committee on Education sang Sangguniang Panlungsod, ini ang paagi sa ordinansa kun sa diin hatagan sang libre nga school supplies ang Kinder Garten tubtob Grade 6.
Sa P30 million nga budget, tanan nga masobra 65,000 nga estudyante ang hatagan gikan sa 44 ka mga eskwelahan.
Paathag ni Espino nga ang P30 million nga budget ang gikan sa P15 million sang General Fund sang ciudad kag ang P15 million ang gikan sa Special Education Fund.
Nagadangat sa masobra P400 ang balor sang school supplies nga mabatun sang kabataan nga ginalakipan sang plastic envelope, notebooks, papel, lapis, ballpen, crayons kag ruler.
Department of Education (DepEd) naman mismo ang nagpili sang mga malakip sa ipanghatag nga school supplies.
Gina-ako naman ni Espino ang responsibilidad, nga wala nakapanghatag sang libre nga school supplies tinalikdan nga School Year bangod wala nila na-antisipar ang tuman nga pagmahal sang presyo gani tuman ka gamay sang mabaton sang mga kabataan sa P15 million nga budget.
Ginapakamaayo man sang konsehal nga magluwas sa P15 million gikan sa ciudad, ginpahanugutan sang National Government ang P15 million gikan sa Special Education Fund.
Samtang ginalantaw naman nga ipadul-ong na lamang sa mga buluthuan ang mga school supplies pinaagi sa Bacolod City Disaster Risk Reduction and Management Office.
