Nagtakop na subong nga adlaw ang pagpanagtag sang libre nga schools supplies sa mga elementary pupils sa ciudad sang Bacolod.
Sa interview sang Bombo Radyo Bacolod kay Councilor Al Victor Espino, chairman sang Committee on Education sa Sangguniang Panlungsod, matapos na sila subong nga adlaw, Biyernes, Agosto 9 sa ila nga pagpanagtag sang libre nga school supplies sa mga elementary pupils.
Suno kay Espino, gindul-ong na nila ang mga libre nga school supplies sa Handumanan Elementary Schoo subong nga adlaw.
Masobra naman sa 65 mil ka mga estudyante sang 46 ka mga eskwelahan sa ciudad sang Bacolod ang nakabenepisyo sa libre nga school supplies.
Ginpahayag naman ni Espino nga indi magkabalaka ang mga kabataan nga late enrollees bangud ginatinguhaan man sang ciudad nga sila ang mahatagan man.
Suno sa konsehal sa ila nga projection wala sang estudyante nga indi makabaton sang libre nga school supplies.
Gin-athag man sini nga indi na sila magpanagtag pa sang school supplies sa mga late enrollees sabaylo ibilin nila ini sa DepEd kag diri na magarequest ang mga maestra.
Ang pagpanagtag sang libre nga school ang produkto sang city ordinance nga gin-author sadto ni Former Councilor kag sa karun Punong Barangay Atty. Caesar Distrito.
Nagdangat naman sa P30 million ang budget nga gingamit para sa pagpamakal sang mga school supplies.
