Naga-umpisa na ang pagpanagtag sang Commission on Elections sang Voters Information Sheet (VIS) sa tanan nga mga botante.
Sa interview sang Bombo Radyo Bacolod kay COMELEC – Negros Island Region Director Atty Lionel Marco Castillano, sa VIS, may-ara sang sample ballot, listahan sang kandidato, kun diin ang voting center kag voting precinct kasubong man ang instruction materials sa proseso sang pagboto.
Paathag ni Castillano nga indi kaangay sa mga sample ballot nga ginahatag sang mga kandidato, ang sample ballot sa VIS ang wala pa sang nakasulat nga pangalan.
Suno diri ang paghatag sang VIS ang requirement sa layi, apang wala lamang napatuman sa nakaligad nga mga eleksyon.
Pahayag ni Castillano nga ginseguro gid ni Comelec Chairman George Erwin Garcia nga mahatag na ang VIS para sa May 2025 Midterms Election.
Paathag sini nga ini ang isa sa paagi agud mafamiliarize na sang mga botante ang proseso kag mapadasig ang eleksyon sa Mayo 12.
Pasalig sini nga sila ang wala nagapatigayon sang signature campaign kag ini ang wala sang kaangtanan sa pamulitika.
Suno diri, ang mga Job Order Casuals nga magalibot ang magapapirma sa pagbatun bangod ini ang basihan agud maseguro nga ginhimo nila ang trabaho.
Ini agud malikawan nga may JO nga magabatun lamang sang sweldo apang wala man gindul-on ang mga VIS sa botante.
Kun indi luyag sang botante nga magbatun, mahimo man nga ibilin na lamang sang JO ang ila VIS kag maganote nalang sang “refuse to sign.”
Suno kay Castillano, may maximum lamang nga 1,000 voters sa kada voting precinct.
Maga-umpisa ang early voting alas-5:00 sang aga para sa mga priority voters kalakip ang mga nagabusong, senior citizens kag persons with disability (PWD).
Magasugod naman alas-7:00 sang aga ang regular voters.
