Nangin mabudlay ang pagpanaog sang bangkay sang lima ka gina-aligar miyembro sang New People’s Army (NPA) nga napatay sa nagluntad nga engkwentro sa tunga sang NPA kag miyembro sang 62nd Infantry Battalion sang Philippine Army sa Barangay Quintin Remo, Moises Padilla, kahapon sang kaagahon.
Sa interview sang Bombo Radyo Bacolod kay Police Lieutenant Armel Lasap, deputy chief of police sang Moises Padilla Municipal Police Station, wala nangin mahapos ang pagrekober kag pagpanaog sa mga bangkay bangod nga malayo ang area sang engkwentro kag gindugangan pa sang mainulanon nga tiyempo.
Ang lima ka bangkay ang ginalakipan sang apat ka lalaki kag isa ka babayi.
Ginhingyo sini sa mga evacuees nga mag koorperar sa militar kag kapulisan nga yara lugar agud magbulig kag nagpanugyan man ini sa mga miyembro sang rebelde nga grupo nga indi na magbato kag magbalik na lamang sa sabak sang gobyerno.
Sa karun yara na sa 497 ang narekord nga numero sang mga evacuees sa Barangay hall sang Barangay Quintin Remo.
