Ginklaro sang isa sa mga sektor nga maga-upod sa Trillion Peso March bwas, Setyembre 21, nga tuhoy lamang sa isyu sang kurapsyon ang sakop sang patigayunon nga rally.
Sa interview sang Bombo Radyo Bacolod kay former Negros Occidental Governor Rafael “Lito” Coscolluela, founding chair sang Paghimud-os Negros Incorporated, sila ang magatipon bwas sa Negros Occidental Capitol Lagoon kadungan sa panawagan sang One Negros Ecumenical Council (ONE-C) nga anti-corruption rally.
Apang bangod sa ginalauman nga kadamuon sang magapasakop, tungaon nila ang martsa sa duha ka dalan padulong sa Bacolod City Public Plaza.
Magasugod naman ang opisyal nga rally alas-2:00 sang hapon.
May-ara ma sang marshals nga ibutang ang rally organizers sa kun ano ang plastada sang aktibidad.
Magagikan naman sa lainlain nga sektor ang mga magatindog nga speaker, nga magapa-utwas sang ila kaakig sa indi na maagwanta nga kinawatay sa gobyerno.
Apang pahanumdom ni Coscolluela nga indi sakop sa agenda sang rally ang pagpanawagan nga pahalinon sa pwesto si President Ferdinand “Bongbong” Marcos Jr.
Aminado ini nga may mga nagpamangkot naman tuhoy sa pagpatigayon sang kaangay nga panawagan, apang gin-ayo nila nga kun mahimo isa lamang anay ka issue ang mangin focus.
Suno diri, indi karun ang tion sa pagtumba sang gobyerno, bangod sa pagpapanaog kay Marcos, ang magabulos amo si Vice President Sara Duterte nga may issue man sang kurapsyon.
Pahayag sang anay gobernador nga importante nga mabalay anay ang anti-corruption drive, kag dapat sa masunod pilion na sang maayo ang magapungko sa gobyerno.
Hingyo sini nga indi na basta magboto depende sa kwarta, bangod sa masami ang kwarta nga ginagamit ang gikan man sa kurapsyon, kag kun sila ang mapabay-an maliwat lamang ang hitabo.
