Nagapati ang commander sang 303rd Infantry Brigade sang Philippine Army nga luyag ipakita sang mga miyembro sang New People’s Army sa mga kandidato sa eleksyon nga mabakod pa ang ila pwersa gani mapilitan ang mga ini nga maghatag sang campaign fee kag permit to win.
Sa interview sang Bombo Radyo kay Brigadier General Inocencio Pasaporte, ang pag-ambush sang NPA sa patrol car sang Binalbagan Municipal Police Station sa Sitio Candida Dos, Barangay Bi-ao sang Domingo sang aga ang paagi sang komunista nga grupo agud makapadala sang pamahog sa mga nagapadalagan sa eleksyon nga maghatag sang ila nga ginapangayo.
Suno kay Pasaporte, indi na ini bag-o sa tion sang eleksyon kun sa diin may yara sang permit to campaign and permit to win sa mga lugar nga may presensya sang NPA.
Bangud sini, nagpahanumdom si Pasaporte sa mga kandidato nga indi magpadala-dala sa extortion letters sang NPA.
Suno sa Army official, ginapakita lang sang NPA nga mabakod pa ang hubon apang sa pagkamatuod, mahuyang na ini matapos mapatay sa engkwentro ang pila nila ka official kag nagduso sa grupo nga magkuha sang cadre ukon lider sa iban nga bahin sang pungsod.
Magluwas sa mga napatay, madamo naman sang nagsungka sa southern Negros kun sa diin dala pa sang mga ini ang ila nga armas sang nagbalik sa sabak sang gobyerno.
