Pagpangawat ukon kaangtanan sa illegal nga droga ang pila sa mga motibo nga ginalantaw rasun sa pagluthang patay sa isa ka lalaki sa Purok Narra, Barangay Tabugon, Kabankalan City sang Lunes, Hulyo 21.
Ang biktima ang ginkilala nga si John Raymund Asucena, residente sa lugar.
Sa interview sang Bombo Radyo Bacolod kay Police Captain Sammy Gasataya, Deputy chief of Police sang Kabankalan City Police Station, sa ila imbestigasyon duha ang ginatudlo nga suspect sa krimen kag cal. 45 pistol ang armas nga gingamit.
Ang biktima ang may tatlo ka igo sang bala nga ginalakipan sang isa sa likod nga bahin sang ulo nga naglapos sa agtang, isa sa dughan kag isa sa alatrasan.
Ginalantaw ni Gasataya nga mahimo personal grudge ang rasun sa pagpatay.
Nakita sang mga ini nga si Asucena ang yara sa ila monitoring list nga imbulbado sa illegal nga droga.
Ini ang may mga record man sa Barangay bangod sa pagpangawat.
Panawagan sang hepe sa mga pumuluyo sa lugar nga makig-angot sa ila inkaso may ara sang impormasyon nga makabulig sa pagsolbar sang krimen.
