Duha ang motibo nga ginatutukan sang Bacolod Police Station 2 sa imbestigasyon sa pagluthang patay sa gina-alegar kawatan sa Reclamation Area sa Palanca Road, Purok Lampirong, Barangay 2, Bacolod City sang Huwebes sang aga.
Ang biktima ang ginkilala nga si Joemarie Villapana alias Negro, 33 anyos, single, residente sang Purok Boulevard, Barangay 14, Bacolod City.
Sa interview sang Bombo Radyo Bacolod kay Police Captain Glenn Montaño, station commander sang Bacolod Police Station 2, ang biktima ang nagalakat kag natabuan nga kadungan sini ang isa ka kapin 17 ukon 18 anyos nga lalaki sang sila ang nalabayan sang gina-alegar motor riding suspect kag ini ang nag u-turn balik sa ila.
Ang suspect ang may tabon sa nawong, nakalong sleeves at dilargo sang ginparada sini sa higad ang motorsiklo, kag sila ang nagkomprontahanay sang biktima tubtob nga naghunog sang armas luthang ang suspect kag gintiro patar si Villapana.
Matapos makita ang armas, gilayon man nga nagdalagan ang kadungan sini nga lalaki, nga tubtob sa karun wala pa makit-an sang kapulisan.
Isa sa motibo sa pagpatay ang mahimo bangod sa kilala nga notorious nga kawatan si Villapana kun sa diin ini ang masami nga nagabantay sa mga cargo trucks sa BREDCO Port kag ginakawatan ang mga delivery stocks.
Samtang isa man sa ginalantaw sang kapulisan ang mahimo kaangtanan sini sa illegal nga droga.
Ini bangod napriso naman sadto bangod sa Republic Act 9165 ukon Comprehensive Dangerous Drugs Act of 2002 ang magulang sang biktima, gani ginalantaw nga ini ang imbulbado sa illegal activities.
Ginakasubo man ni Montaño nga ang biktima ang naglabay sa lugar nga wala gid sang CCTV.
