Gin-ako sang Islamic State nga sila ang may kahimuan sang pagpangbomba sa Dimaporo gymnasium sa main campus sang Mindanao State University kahapon sang aga kun sa diin apat ang napatay kag masobra 50 ang pilason.
Nagpost ang grupo sa Telegram kag ginpahayag nga mga miyembro sini ang nagpalupok sang bomba sa nasambit nga pagtililipon.
Gin-updan naman sang mga senador si President Ferdinand Marcos Jr. kag iban nga mga opisyales sa pagkondenar sang pagpangbomba nga nagpatay sa indi magnubo apat ka mga persona sa Marawi, Lanao del Sur.
Suno kay Senate President Juan Miguel Zubiri, kaakig kag pagkadismaya ang iya nabatyagan sa pagpangbomba sa Dimaporo gymnasium sa main campus sang Mindanao State University.
Suno sa iya, wala sang tagipusuon ang may kahimuan sini sa mga inosente nga mga pumuluyo nga nagtipon agud makabati sang misa.
Madumduman nga nabawi sang Philippine military ang Marawi City pagkatapos sang lima ka bulan nga pagpakig-away nga nagpatay sa linibo ka mga pumuluyo matapos nga ginkontrolar ini sang pro-Islamic-State foreign kag local fighters sang Mayo 2017.// Suno naman kay Senate Majority Leader Joel Villanueva, kun panumdumon nga ang pagpangbomba ang natabo sa sulod sang isa ka eskwelahan nga kuntani isa ka luwas nga lugar para sa tanan ang makatuga sang kahangawa.
Nagpanawagan ini sa mga otoridad nga mapasabat ang mga suspetsado kag mahatagan sang hustisya ang natabo.// Samtang nagpanawagan naman si Senator Nancy Binay sa Philippine National Police kag Armed Forces of the Philippines nga mas pasanyugon ang ila intelligence efforts batok sa mga lawless elements kag terorista nga grupo.
Nagpaandam naman si Senator JV Ejercito nga ang mga kaangay nga pagpang-atake sa Marawi ang makatuga sang risgo sa komunidad kun pabay-an lamang.
Dugang pa sini nga wala sang lugar ang “acts of atrocious extremism” sa isa ka sosyodad nga nagahatag sang balor sang kalinong kag pag-isa.
Nagapati naman si Senator Ronald “Bato” dela Rosa nga ang may kahimuan sa Marawi blast ang indi mga Muslim ukon Kristiyano kundi mga terorista.
