Nagpasar sang resolusyon ang Sangguniang Panlungsod sang Bacolod nga suspindihon anay ang dakpanay sang mga van nga ginhire sang mga Business Process Outsourcing (BPO) companies sa ciudad.
Ini ang kasunod sang regular nga operasyon sang Land Transportation Office Region 6 kun sa diin gindakop sang mga ini ang shuttle service sang mga BPO companies bangud ini ang colorum.
Sa interview sang Bombo Radyo Bacolod kay Vice Mayor El Cid Familiaran, ginpahayag sini nga nagpasar ang SP sang resolusyon nga nagahingyo sa LTO kag Land Transportation and Franchising Regulatory Board (LTFRB) nga I-suspend lang anay ang apprehension sa mga vans for hire nga ginagamit sang mga BPO companies agud nga masugat-dul ong ang mga empleyado sini subong nga may yara sang enhanced community quarantine bangud sa coronavirus disease 2019 (COVID-19).
Suno sa bise alkalde, ikonsiderar lang kuntani anay sang LTO kag LTFRB nga naga-proseso pa sang special permit ang mga ini.
Suno naman kay Councilor Dindo Ramos, chairman sang committee on transportation sa SP, iprint sang mga BPO ang ila nga application sang special permit sa LTFRB kag ipaskil sa van samtang pending pa ini.
Samtang, ginpasiguro naman ni Mayor Evelio “Bing” Leonardia sa mga BPO workers nga nahitso na ang problema.
Suno diri, kun may yara sang problema dapat pahibaluon gid gilayon ang city government agud nga masolusyunan.
