Magluwas sa kwarta, nagapati ang pakaisa sang Pinay nga ginbuno-patay sang iya Canadian nga bana nga pagpangimon ang isa sa mga rason kun ngaa nahimo sang suspetsado ang krimen sa ila nga balay sa Villa Mikaela, Alice Street, Barangay Singcang Airport, Bacolod City, kahapon sang aga.
Madumduman nga ginbuno si Liezel Demerin St. Jean sang bana sini nga si Ronald St. Jean, 55-anyos, isa ka Canadian national, kag nasaksihan sang mga kabataan sang mag-asawa nga 11-anyos kag pito ka tuig ang pagbuno sang ila amay sa ila iloy.
Apang, matapos ginpatay ni Ronald ang asawa ginlaslas sini ang iya pulso kag ginbuno ang iya kaugalingon sa dughan, rason sang iya kamatayon.// Sa interview sang Bombo Radyo kay Anjanette Demerin, nagapati ini nga magluwas sa kwarta, pagpangimon ang isa sa mga rason kun ngaa naglalisay ang mag-asawa bangud nagatrabaho si Liezel bilang call center agent kag masami nga kaagahon na nga nagapauli.
Samtang, ginkumpirmar sini nga nakit-an mismo sang 11-anyos kag pito ka tuig nga bata nga mag-asawa ang pagbuno ni Ronald kay Liezel antes sila gindala pagwa sang ila pakaisa nga si CJ.
Suno diri, may buot naman ang mga kabataan kag nakaintindi sang natabo kag ila man gin-eksplikar sa mga ini ang sitwasyon.
Suno kay Demerin, sang iya ginpamangkot ang mga kabataan kun diin sila matinir, ginpahayag sang mga ini nga sila ang ginbinlan sang ila iloy nga sa amay ni Anjanette kag tiyo sang ila iloy nga si Bobby ang magaatipan sa ila in kaso nga may matabo nga malain kag indi magsalig sa iban.
Sa karun ang lawas ni Ronald ang yara sa Corazon Locsin Montelibano Memorial Regional Hospital (CLMMRH) samtang sa Bago City naman igahaya ang bangkay ni Liezel.
Suno kay Demerin, suhestiyon ni Bobby nga idungan nalang haya ang mag-asawa bangud ginapangita man sang mga kabataan ang ila amay.
