Padayon ang pagpangita sang Moises Padilla Municipal Disaster Risk Reduction and Management Office (MDRRMO) sa 30-anyos nga lalaki nga naanod sa Binalbagan River alas-9:30 kahapon sang aga, Pebrero 10.
Sa interview sang Bombo Radyo Bacolod kay Moises Padilla Municipal Disaster Risk Reduction and Management Office Head Reynald Horegue, ang lalaki nga namissing ang residente sang Barangay Macagahay sa nasambit nga banwa.
Suno diri, ang lalaki ang naanod matapos nga maglangoy sa nasambit nga suba agud mag-apas sa iya nga amay nga yara sa tabok.
Suno kay Horegue, light rains lamang ang naeksperyensyahan kahapon sa lugar kag indi man tuman ka baskog ang daludo sang tubig sa suba.
Ginapanawagan naman ang tanan nga pumuluyo nga malapit sa lugar nga makipag angot sa Moises Padilla DRRMO sa numero nga 09383764096 ukon sa mga barangay officials kun may ara sang impormasyon.
