Isa ka insidente sang ‘missing person’ ang nakakuha sang atensyon sang kadam-an kag nagtuga sang pagbinaisay online bangud sa paggamit sang sobra-sobra nga filter kag mga image editing tools sa online.
Napaslawan ang pagpaninguha sang mga otoridad kag publiko nga makit-an ang isa ka 30-anyos nga babayi nga nadula bangud ang gingamit sang mga kapulisan nga litrato sa poster amo ang edited nga guya sang babayi kag layo gid kun ikumpara sa iya matuod-tuod nga guya.
Si Grecia Guadalupe Orantes Mendoza ang nadula sang Abril 12 sa Chiapas, Mexico.
Kasunod sang report nga gin-file sang himata ni Grecia, gin-activate sang kapulisan ang Alba Protocol para sa gilayon nga pagpatigayon sang ‘search for missing women.’
Bilang parte sang protocol, naggamit ang mga otoridad sang pila ka mga litrato ni Grecia nga ila ginkuha sa iya social media agud makahimo sang ‘missing person’ nga poster, kag ila ginpalapta online kag sa mga lokal nga komunidad.
Apang may yara sang problema, suno sa mga tawo nga nakakilala sa 30-anyos nga babayi, ang litrato sa poster ang wala gid naga-anggid sa iya.
Sa ini nga mga kaso, isa sa may pinakadako nga papel amo ang poster apang sa sini nga kaso, mas nangin mabudlay sa mga tawo ang pagpangita sa nadula nga babayi.
Pila ka adlaw antes nakit-an si Grecia sa isa ka highway kag ini ang nagpabilin sa kustodiya sang kapulisan.
Sa pihak nga bahin, ang kaso ni Grecia ang nagtuga sang nagkalain-lain nga debate natuhoy sa paggamit sang edited nga mga litrato sa poster.
Suno kay security consultant nga si David Saucedo, natukiban sang The National Search Commission for Missing Persons nga masami nagakapaslawan ang Alba Protocol sa pag-locate sang mga nagkaladula nga persona bangud AI generated ang mga litrato sa social media.
