Ginpauntat na sang pinuno sa Bacolod Traffic Authority Office (BTAO) ang pagticket sang Metro Bacolod Towing Services sa pagpatigayon sang clamping kag towing ordinance.
Ini kasunod sang pagkwestyon ni former Councilor Archie Baribar sa validity sang Memorandum of Agreement sa tunga sang pribado nga kompanya kag Bacolod City Government nga gina-alegar nag-expire na sang Disyembre 31, 2023.
Sa interview sang Bombo Radyo Bacolod kay BTAO Head Patrick Leonard Lacson, welcome development para sa ila ang pagkwestyon ang anay konsehal kag wala nila ini ginakabig nga insulto ukon pamulitika.
Ginapasalamatan man sini si Baribar bangod sa pagkwestyon sini ila man na review ang kontrata kag gilayon nakamando sa Metro Bacolod Towing Services nga samtang wala pa nakapirma sang panibag-o nga MOA, temporaryo nga i-address anay sa BTAO ang resibo.
Nahibaluan sini nga antes ang pagkwestyon si Baribar, natow ang salakyan ni Baribar, apang paathag sini nga welcome gid ang pagpalab-ot sang concerns sang mga pumuluyo agud matun-an ang mga pagsulundan.
Paathag ni Lacson nga implementing body lamang ang BTAO kag indi mga lawmakers, kun sa diin sila ang nagabatun lamang kag nagapatuman sang mando.
Gindumdom man sini nga malawig na ang clamping kag towing ordinance apang wala ginpatuman.
Suno kay Lacson, nakita sini nga madamo naman sang magapasaway sa dalanon kun untaton ang clamping kag towing activities.
Ginapakamaayo man sini kun mapatpat ang tuigan nga MOA agud nga matadlong ang mga pagpatuman nga dapat na maislan.
Paathag sang BTAO Head nga magapadayun ang towing activities bangod may-ara na sang agreement sa Metro Bacolod Towing Services apang ang ticket sa clamping ang itugyan na Bacolod City Treasurers’ Office, kag ginapakamaayo man sini nga madasig man nga nag-ugyon ang kompanya.
Paathag ni Lacson nga ang katuyuan sang programa amo ang masuloyunan ang trapiko as ciudad sang Bacolod kag nagapati ini nga apisar may mga nagareklamo, mas madamo sang nagapasalamat sa towing kag clamping ordinance.
Sa pihak nga bahin, mabudlay naman kun ang local government unit (LGU) ang magabakal sang tow trucks kag personal nga magapatuman sang ordinansa.
Suno kay Lacson, kun ang Bacolod City Government ang magapatuman, magagasto pa sang dako sa pagbakal sang tow truck, driver, gasolina kag mekaniko kag malawig pa ang red tape antes mahatag ang mga budget.
Ini ang napamatud-an na nationwide gani kalabanan ang nagapatigayon sang Public Private Partnership bangod magluwas nga wala na sang iban pa nga asikasuhon, ang lokal nga gobyerno ang magabatun pa sang porsyento kaangay sa clamping and towing kun sa diin 25 porsyento ang nagakadto sa Bacolod City Government.
