Nagakalipay ang Progressive Alliance of Capitol Employees (PACE) sa pagpasar sang hagna nga magapanubo sang optional retirement age sang mga empleyado sang gobyerno.
Sa interview sang Bombo Radyo kay PACE Vice President Renelo Lastierre, ginpahayag sini nga nagakalipay sila sa pagpanubo sang optional retirement age sa mga government employees halin 60 anyos pakadto 56 anyos.
Suno kay Lastierre, ang nasambit nga hagna ang makabenepisyo sa mga empleyado nga may edad na apang pila ka tuig pa lang nga nagaubra sa gobyerno.
Suno sa iya, apisar nga wala pa nakalab-ot sa retirement age ang isa ka empleyado, kun 15 ka tuig na ini nga nagaserbe sa gobyerno, sarang na ini nga makakuha sang retirement benefits sa Government Service Insurance System (GSIS) samtang 10 ka tuig naman agud mangin kwalipikado sa Social Security System (SSS).
Gindugang man sini nga kun huben pa ang isa ka empleyado sang nagsulod sa gobyerno, mas timprano pa nila ma-enjoy ang ila nga ginpangabudlayan.
Suno sa iya, magluwas sa ginabaton nga sweldo, maayo gid kun may yara sang pocket income ukon kwarta nga pwede makuha matapos magretiro kag mas manami gid kun timprano pa nagsugod sa pag-ubra sa gobyerno.
