Ginaduso sang business sector nga panubuan ang curfew hours nga ginapatuman sa siyudad sang Bacolod halin sa orihinal nga 10pm-4am padulong sa alas-12:00 sang tungang gab-i tubtob alas-3 sang kaagahon.
Suno kay Frank Carbon, chief executive officer sang Metro Bacolod Chamber of Commerce and Industry (MBCCI), nagdraft ini sang sulat nga igapasa sa talatapan ni Bacolod City Vice Mayor El Cid Familiaran kag nagalaom nga mapamatian ini.
Nahibaluan nga madamo ang negosyo nga tuman ka diutay ang nangin income ilabi na sa mga resto bars nga gab-i kalabanan naga-operate bangod sa curfew.
Suno kay Carbon, makatipon sang sales ang nasambit nga mga negosyo kun sarang sila maka-operate kun gab-i nga ila naman nga ibayad sa city government.
Ginaduso man sang business sector ang ginatawag nga bundle of measures agud nga matatapan ang kinahanglanun sang siyudad.
Pagatun-an naman sang siyudad ang nahanungod sa proposal nga luyag iduso sang business sector sa pagpanubo sang oras sang curfew period.
Suno kay Bacolod City Vice Mayor El Cid Familiaran, hulaton nalang nga magsulod sa Sangguniang Panlungsod ang proposal kag igadiscuss kay Bacolod City Mayor Evelio “Bing” Leonardia.
Dapat naman nga magpatuman sang amendment kun ipasar ang amo nga proposal nahanungod sa pagpanubo sa curfew bangod una na nga napatuman ang 10pm-4am curfew ordinance.
Sa kaangot nga balita, ginahingyo man sang Metro Bacolod Chamber of Commerce and Industry nga tax amnesty sa business and real property taxes nga makunsidera nga double blade bangod magahatag man ini sang cash nga makabulig sa siyudad.
Kabahin man sang bundle of measures ang pagpanubo sang curfew hours nga magahatag sang sales nga ginkuhaan man sang sales tax para sa gobyerno.
Kasunod amo ang paghatag sang market place para sa mga micro businesses, fishermen kag mga farmers kaangay sang night market, week-end market, roling stores ukon ang pagpahanugot sang City government sa mga mall nga maghatag sang space sa manubo nga presyo agud nga mas mapalapit sa mga pumuluyo ang mga produkto.
Suno kay MBCCI chief executive officer Frank Carbon, tinutuyo sang tikang nga magdalagan ang sales sa siyudad nga magahatag naman sang livelihood taxes.
Magabenepisyo man ini sa mga micro grants kaangay sang mga nagalibod sang mani, fishball, banana que kag nagaluto sang mais sa dalan.
Suno kay Carbon, dapat nga magstep-in ang gobyerno agud nga mabuligan ang mga magagmay nga negosyo nga makabalik sa operasyon.
Panugyan man sini ang pagbantay sa presyo sang mga produkto bangod sa naganubo nga kapasidad sang mga pumuluyo sa pagbakal tuga sang kapigaduhon.
Nakigsugilanon naman ini kay Familiaran nga diri nalang ipadala ang sulat bangod kinahanglanon pa ini nga tun-an.
