Umpisahan na subong nga adlaw ang pagpapauli sa mga evacuees sang banwa sang La Castellana nga naapektohan sang paglupok sang bulkan Kanlaon sa karun nga ginpapanaog na ang alert status sang bulkan sa alert level 2.
Suno kay La Castellana Municipal Disaster Risk Reduction and Management Office Head John de Asis, subong nga adlaw umpisahan ang pagpapauli sa mga Internally Displaced Persons (IDPs) nga nagapuyo sa sulod sang 4-6km Extended Danger Zone (PDZ).
471 ka mga pamilya ukon 1,586 ka mga indibidwal ang amat-amat nga idul-ong sa ila tagsa ka mga balay.
Apang may yara pa sang mga residente nga nagapuyo sa sulod sang 4km Permanent Danger Zone nga indi makabalik sa ila mga balay.
May 10 ka pamilya sa Brgy Masulog kag lima ka pamilya sa Brgy Biak na Bato nga magapabilin sa evacuation centers.
Samtang, iban sa mga IDPs nagpabutyag nga indi nila luyag magpauli bangod kun yara sila sa evacuation centers may yara sila sang pagkaon kag mahatag ang ila medical needs apang ginapa-intindi sa ila nga indi mahimo nga indi sila magpauli sa ila mga balay.
Apang iban sa mga residente nagareklamo man nga wala sila sang pulian bangod nagkalaguba ang ila mga balay.
