Patigayunon sa Pebrero 12, 2024 tubtob sa Setyembre 30, 2024, ang pagparehistro para sa pala-abuton nga Mid-term Election sa masunod nga tuig.
Sa interview sang Bombo Radyo kay Atty. Katrina Trinio Caña, election officer sa ciudad sang Bacolod, maga-umpisa na sa masunod nga bulan ang nationwide nga pagpatigayon sang pagparehistro para makaboto sa Mid-term Election sa masunod nga tuig.
Ini magadugay tubtob sa Setyembre kag sa bulan sang Oktubre naman, ang natalana nga tion para magfile sang Certificate of Candidacy sa luyag nga magpapili sa 2025 mid term election.
Suno kay Caña, wala pa sang exact nga petsa para sa mga patigayunon nga sattelite registration para sa mga malls kag barangay sa ciudad, apang magapagwa man sang notice ang COMELEC angot diri.
Sa may luyag man nga magparehistro magpadulong lang sa COMELEC bitbit ang government issued ID’s nga may yara sang address, apang kun wala man sang address ang ID, mahimo nga magdala lang sang mga supporting documents kaangay sang water kag electric bill.
Samtang, indi naman mabaton ang mga company ukon employee ID’s.
Sa mga luyag naman magpare-activate, ini mahimo lang via online.
Ang opisina sang COMELEC, bukas alas 8:00 sang aga tubtob alas 5:00 sang hapon.
