Kalakip ang plano nga pag-implementar sang penalidad sa mga madakpan nga nagahaboy sang basura sa indi husto nga lugar sa tikang sang Bacolod City Government agud ma-address ang problema sa pagbaha.
Sa interview sang Bombo Radyo Bacolod kay City Administrator Atty Mark Mayo, sa pagconvene sang Solid Waste Management Board kalakip sa action plan sa mitigation ang clearing operation ukon pagpaninlo sang mga waterways.
Kaangay sa ginpatigayon nga clearing operations sa Banago Creek, kun sa diin nakuha ang 11 ka tonelada nga basura samtang sa Bata creek kahapon nahakot naman ang 17 ka tonelada sang basura.
Suno kay Mayo, wala sang pulos ang pagpatigayon sang clearing operations kun segi-segi man ang paghaboy sang basura sang pila ka pumuluyo.
Ginatun-an nila ang sarang nga mangin intervention sang Sangguniang Panlungsod paagi kay Councilor Homer Bais, ang chairperson sa committee on Environment and Ecology.
Ginaduso nga amyendahan ang existing anti-littering ordinance kag pasakaan ang penalidad.
Aminado man ini nga nangin mabudlay ang implementasyon bisan sang national law nga Solid Waste Management Act of 2001 partiular na sa aspeto sang segregation at sources.
