Pagdaog para sa mga konsumedor ang ginpasar nga Republic Act 12022 ukon Anti-Agricultural Economic Sabotage Act.
Sa interview sang Bombo Radyo Bacolod kay General Alliance of Workers Association (GAWA) Secretary General Wennie Sancho, pinaagi sa layi maplastar ang fair trade practices partikular na sa industriya sang bugas kag kalamay.
Pinaagi sini, matapna man ang hoarding, cartel operations, over pricing, kag tuman nga importasyon sang mga produkto.
Ini bangod ang mga nagahimo sang nasambitan nga tikang ang sarang na nga mapasakaan sang kaso sa idalom sang RA 12022.
Isa pa sa pinaka-importante sini nga aspeto amo ang pagregulate sa mga basic services kaangay sang kuryente kag tubig.
Kaangay na lamang sang Bacolod City Water District kag Prime Water nga sarang na nga mapasakaan sang kaso kun indi mahatag ang supisyente nga supply sang tubig kasubong man kun wala ginahatagan solusyon ang mga problema sa water distribution.
Paathag ni Sancho nga makabig Economic Sabotage ang indi bastante nga supply sang tubig kag kuryente bangod apektado sini ang operasyon sang mga manufacturing industries kag iban pa.
Panindugan sini nga kun wala sang ahensya sang gobyerno nga magahimo sang tikang batok sa mga ini, sila na mismo ang magapasaka sang kaso.
Nagapati si Sancho nga kun indi mafilan sang kaso partikular na ang BACIWA Primewater, sila ang kutob lamang sa promisa kag indi man magatuman.
Ang importasyon sang high fructose corn syrup ang isa man sa maregulate sang layi, bangod ginapatay sini industriya sang local nga kalamay.
Ang RA 12022, ang magaserbe dugang nga guwardiya nga magaprotekta sa mga sugar planters kag workers.
