Gin-athag sang gobernador sa Negros Occidental nga katumanan na sang promisa sang mga Senador sa 2022 Election ang pagpasar sa Senador sang Senate Bill 2507 ukon Negros Island Region Act.
Sa interview sang Bombo Radyo Bacolod kay Negros Occidental Governor Eugenio Jose “Bong” Lacson, sang kampanya para sa 2022 Election, madamo sang mga Senador nga nagpromisa nga magaduso sang pagbalik sang NIR.
Paathag sang gobernador nga magapatigayon pa sang bicameral conference ang Senado kag House of Representative agud maplantsa ang kinalain sang version sang ginpropose nga hagna.
Apang nagapati si Lacson nga minimal lamang ang mangin pagbag-o kag ini ang ipasa na sa Office of the President.
Nagalaom ang gobernador nga pirmahan ni President Ferdinand “Bongbong” Marcos Jr ang hagna agud mangin layi antes paman ang masunod sini nga State of the Nation Address (SONA).
Sa pihak nga bahin, sa tion nga mapasar na ang layi, aminado si Lacson nga magabalik sa umpisa kag magapanglaghap pa ang Negros Occidental, Negros Oriental kag Siquijor, apang nagapati ini nga giyahan ni Senate President Juan Miguel Zubiri tubtob nga magmature na ang NIR.
Positibo ang gobernador nga sa pagmature sang bag-o nga Rehiyon, didto na makita ang dako nga pagsanyog sa ekonomiya sang NIR.
