Kapin sa 250 ka mga indibidwal halin sa 15 ka mga organisasyon ang nag-ululopod para magpatigayon sang rally sa ciudad sang Bacolod kasunod sa pagselebrar sang Labor Day kahapon.
Sa interview sang Bombo Radyo kay Pricella Guco, secretary general sang Partido Manggagawa- Negros, madamo sila sang miyembro nga nag-upod gikan sa ciudad sang Bacolod kag Bago kag banwa sang Binalabagan kag iban pa, samtang wala naman nakatigayon nga mag-abot ang iban nga miyembro halin sa malayo nga LGU.
Nagapanawagan ini nga ipasar na ang wage increase bangod nagasaka man ang presyo sang mga balaklon sa karun.
Nag-upod man ang mga kabataan sa pagrally kahapon para manawagan sang wage increase para sa ila bwas damlag.
Suno sa Kabataan Partylist, dapat ihatag na ang P200 nga wage increase para sa mga mamumugon bangod sa tion nga makagradwar sila nga mga estudyante, kinahanglan man nila mangita sang palangabuhian agud makasustento sa ila pang-adlaw adlaw nga kinahanglan.
