Aminado ang political analysts sa ciudad sang Bacolod nga mabudlay mapasar ang people’s initiative para sa amendment sang 1987 Constitution bangod kulang-kulang ang nakapagkit sa layi nga nagasuporta sa inisyatibo.
Sa interview sang Bombo Radyo Bacolod kay Atty. Jomax Ortiz, sa ulihi ang ruling sang Korte Suprema gid amo ang sundon.
Paathag sini nga matapos makatipon sang kinahanglan nga pirma, ini ang ipadala sa Commission on Election (COMELEC) para sa verification.
Kun mapamatud-an sang COMELEC nga valid ang pirma ang mga pumuluyo kag malab-ot ang 12 percent sang voter’s population nga requirement, mahimo mapadayun ang plebisito sa pag-amyenda sang konstitusyon.
Apang suno kay Ortiz, kun kinamatarong ang pagpirma para sa people’s initiative, kinamatarong man sang bisan ano nga grupo nga magkwestyon sa Korte Suprema.
Ini bangod sang 2006, sa administrasyon ni former President Gloria Macapagal Arroyo, una na nga ginbasura sang Korte Suprema ang people’s initiative nga gindihon.
Ini bangod sa rulings, ginpanindugan sang Korte Suprema nga minor amendments lamang ang sarang mahimo pinaagi sa people’s initiative.
Apang ang ginaduso sa karun nga amendment sa economic provisions kasubong man sa term of office sang mga public officials ang makabig nga major amendments.
Dugang pa ni Ortiz nga ginpahayag man sang Korte Suprema, sa pagpatigayon sang people’s initiative, kinahanglan nakapagkit ang partikular nga mga provisions nga amyendahan kag wala sang imbulbado nga public funds.
Bangod wala sang nakapagkit kun ano ang mga partikular nga amendments, kag mahimo madugangan pa sa pagpadayun sang proseso, kasubong man may nagalibot nga balita tuhoy sa baklanay sang pirma, gina ginalantaw sang abogado nga mangin taklarun ang pagpakigbato agud ini ang aprubahan sa Korte Suprema.
