Ginaduso ni Senate President Win Gatchalian ang pagpasar sang Comprehensive School Safety Act ukon Senate Bill No. 2426 kasunod sang mga asod-asod nga school violence sa mga buluthuan, kalakip na diri ang pinakaulihi nga insidente sang pagpangluthang sa Banga National High School sa South Cotabato.
Katuyuan sang hagna nga magtukod sang National Comprehensive School Safety Framework nga magserbe bilang giya sa mga eskwelahan ilabi na sa paglikaw ukon pagsabat sa mga insidente nga mahimo makaapekto sa seguridad sang mga kabataan kag personnel.
Sa idalom sang proposal, ang pagtukod, pagpatuman, kag regular nga pag-update sang framework ang bululigan sang nagkalain-lain nga ahensya sang gobyerno kag lokal nga panguluhan, sa pagpanguna sang Department of Education (DepEd).
Kabahin man sa hagna ang paghimo sang School Safety Plan nga kinahanglan i-handa kag i-update kada tuig sa tagsa ka buluthuan.
Gina-require man ang mga buluthuan nga regular nga mag-update sang School Safety Handbook nga nagaunod sang mga polisa, proseso, emergency information, kag mga serbisyo nga mahimo dalangpan sang mga estudyante.
Ilakip man dapat ang School Code of Conduct sa Handbook.
Suno sa Senador, indi dapat mag-focus ang ekswelahan sa intervention kun natabo na ang insidente.
Kinahanglan, may-ara sang maathag nga sistema agud indi mabutang sa katalagman ang kabuhi sang tanan.
