Nagaapelar si Barangay Kagawad Jonathan Diaz sang Barangay 18, Bacolod City nga makahimo sang layi nga nagaprotekta sang kinamatarong sang Lesbian, Gay, Bisexual, kag Transgender (LGBT) community.
Ini ang kaangot sa brutal nga pagpatay kay Joel Aviles Jr. nga nasapwan nga nasulod sa sako sa bakante nga lote sa Purok Malipayon, Brgy. 35, Bacolod City, Setyembre 8 sang aga.
Si Aviles, 30 anyos, ang residente sang Purok 3 Lampirong, Sitio Magsungay, Barangay Singcang-Airport, Bacolod City kag isa ka masahista.
Sa interview sang Bombo Radyo kay Diaz, ginakondenar kag ginakasubo sini ang natabo kay Aviles kag nagalaom nga mahatagan ini sang hustisya.
Suno sa iya, tuman ang pagpalapas sa kinamatarong sang biktima ilabi na sa pamaagi sang pagpatay sa iya.
Nabasahan man sini ang mga hibubun-ot sang iya kaangay nga mga LGBT members kag madamo ang nagahambal nga maayo klase nga tawo kag abyan si Joel.
Bangud diri, nagahingyo sang acceptance kag equality ang mga LGBT bangud halin sang una, indi patas ang pagtratar sa ila.
Suno kay Diaz, kun may sala man nga nahimo ang isa ka miyembro sang LGBT, may yara sang due process nga ginasunod kag indi basta-basta nga patyon ang mga ini.
