Ginalantaw sang bestfriend ni Brian Mark Agillo nga may posibilidad nga nahanungod sa iligal nga droga ang kabangdanan sa pagpatay sa biktima.
Madumduman nga sang Huwebes, si Agillo ang nasapwan nga wala na sang kabuhi samtang yara sa sulod sang ginamaneho nga van sa Hacienda Manaol, Barangay Matab-ang, Talisay City.
Sa interview sang Bombo Radyo Bacolod kay Alyas Rick, humalin Kinder tubtob makagraduate sang High School updanay na sila ni Agillo kag nagkaupod man ang mga ini sa boarding house sang 2020.
Wala ini sang nahibaluan nga may nakaaway ang biktima, bangod komedyante ang pagkakilala niya diri kag bisan awayon, ini ang nagakadlaw lamang.
Aminado ini nga makapila man nga naghulam sa iya si Agillo sang kwarta nga gulpyada apang wala na sini ginahambal ang pagagamitan.
Magluwas sa pagrent a car, ang biktima ang nagtrabaho man bilang call center agent kag nagahabal-habal driver, samtang kun kaisa ini ang nagabaligya man sang prutas.
Suno kay Rick, madamo sang diskarte si Agillo sa pagpangabuhi ilabi na nga ang live in partner sini ang bag-o lamang nakabata.
Ginalantaw sini nga malayo nga rasun sa pagpatay ang utang, bangod ang kaangay nga rasun ang indi man sini makita nga magduso sa isa ka persona para magpatay.
Gani ginalantaw sini ang posibilidad nga may kaangtanan sa iligal nga aktibidad ang kamatayon ni Agillo.
Suno kay Rick, sang sila ang soltero pa lamang nagpahayag na si Agillo nga ini ang nagagamit sang marijuana, apang wala na niya ini ginpadalman sa pagpinsar nga nagalahog lamang ang abyan.
Apang matapos mabalitaan ang pagpatay kay Agillo, indi lamang siya, bangod bisan ang iban pa nila nga mga batchmates kag abyan ang nagapinsar naman sang kaangay nga posibilidad.
Pangabay na lamang sini nga konsensyahon ang naghimo sang krimen.
