Gin-ako sang mga katapo sang New People’s Army ang pagtiro-patay sa isa ka senior citizen sa Sitio Maabo, Barangay San Isidro sa banwa sang EB Magalona sang tinalikdan nga Hulyo 13.
Ginkilala ang biktima kay Jerry Solinap, 64-anyos, kag residente sa amo nga lugar.
Base sa press release sang Roselyn Jean Pelle Command- New People’s Army, gina-alegar sang grupo nga si Solinap ang nagpatay sang mag-asawa nga residente sa Sitio Trinity, Canlusong sa nasambit nga banwa sang 2004.
Gina-alegar man sang makawala nga grupo nga kriminal si Solinap kag ini ang imbolbado sa pagpangawat sa mga karabaw kag iban pa nga kasapatan nga nagsugod sang tuig 2007.
Samtang, gin-ako man sang mga rebelde nga grupo nga sila man ang nagpatay sa mangunguma nga si Aldrian “Noynoy” Aldijar sa Sitio Gut-ak, Barangay Abaca, Cauayan, Negros Occidental sang July 9, 2026.
Gina-alegar sang makawala nga grupo nga si Aldijar ang nagaserbe nga intelligence asset sang Philippine Army’s 15th Infantry Battalion, Philippine Army.
Sa interview sang Bombo Radyo Bacolod kay Police Captain Judesses Catalogo, spokesperson sang Negros Occidental Police Provincial Office, himuon sang NOCPPO ang tanan agud nga mapasaka ang kaso matapos nga gin-ako sang makawala nga grupo nga sila ang may kahimuan sang krimen.
Suno kay Catalogo, may nakasaksi sang ginhimo sang mga ini nga pagpatay.
Suno sa NOCPPO spokesperson nga ang mga claims sang makawala nga grupo nga sala nga nahimo sang mga biktima ang wala sang basehan bangud wala sang record ang Barangay.
Suno diri, nangin trophy na sang mga rebelde ang pagpatay sang mga sibilyan.
Agud nga masiguro ang seguridad sang mga pumuluyo nga nagapuyo sa malagyo nga lugar, ang NOCPPO ang nagbutang na sang mga police detachments kag nagakoordinar man ang mga ini sa Armed Forces of the Philippines.
