Padayon pa ang imbestigasyon sang Manapla Municipal Police Station sa pagpatay sa anay Brgy kagawad sa Hda. Cabayao at Brgy. San Pablo Manapla, Negros Occidental, kahapon alas- 6:00 sang aga.
Ang biktima ang ginkilala nga si Pablo Brillantes, 54 anyos, kasado kag residente sang nasambit nga lugar.
Sa interview sang Bombo Radyo kay Police Captain Marion Vicente Villaflor, Deputy Chief of Police sang Manapla Municipal Police Station, may naistorya na ini nga mga tawo nga makabulig sa imbestigasyon kag masolbar ang kaso.
Nahibaluan nga nagpakuno-kuno ang suspek nga nagapangita sang iya nadula nga karabaw sa pagpamangkot sini sa area.
Suno sa mga witness naggwa si Pablo kag gin-esturya ang suspek sang gulpyada lang nagbunot sang armas-luthang ang suspek kag gintiro ang biktima sa ulo kag nagkalain-lain nga bahin sang iya lawas.
Nagsulod ang suspek sa balay ni Pablo kag ginpahog pa sini ang pamilya sang biktima.
Kasunod sini naglagyo ang suspek kag may ginpatigayon na nga hot pursuit operation ang kapulisan.
Nagacoordinate naman sila sa Philippine Army para sa dugang nga impormasyon.
Sa pihak nga bahin, gin-ako naman sang Roselyn Jean Pelle Command – New People’s Army, Northern Negros Guerrilla Front nga sila ang may kahimuan sa pagpatay kay Pablo Brillantes.
Sa press release nga ginpadala sang Roselyn Jean Pelle Command, ginpatuman sang isa nila ka team ang pagsilot kay Brillantes.
Gin-alegar man sang grupo nga si Brillantes ang responsable sa pagpa-raid kay Marilyn “Ka Mona” Badayos kag tatlo pa ka mga NPA sa Hacienda Builder, sa amo nga barangay, sadtong Septyembre 30, 2021.
Suno sa mga ini, ila narekober gikan kay Brillantes ang isa ka kalibre .45, mga bala kag isa ka handheld radio.
