Ginalantaw nga tripping lang ang pagpatay sa duha ka mga lalaki sa banwa sang Calatrava diri sa Negros Occidental sang Domingo.
Suno kay Police Maj. Roberto Indiape, hepe sang Calatrava Municipal Police Station, nagluntad ang insidente sa Sitio Huwebisan, Barangay Marcelo, Calatrava, Negros Occidental alas-6:00 sang hapon sang Domingo, Agosto 16.
Ang suspetsado ang ginkilala kay Gerone Baynosa, 28 anyos, may asawa kag residente sang nasambitan nga lugar.
Samtang ang mga biktima ang ginkilala kanday Jemar Jemilda, 34 anyos, may live-in partner, residente man sa amo nga lugar kag si Roberto Sanopao Jr., 32 anyos, may asawa kag residente sa Sitio Dilongan, banwa sang Calatrava.
Nagapulupahuway ang mga biktima sa isa ka tyangge sa nasambit nga lugar sang hinali nalang nga nag-abot si Baynosa nga may dala nga .38 caliber revolver.
Hinali sini nga gintiro sang makaduwa ka beses si Jemilda nga naigo sa ulo kag kilid.
Matapos nga nakita ang pagpangluthang, gilayon nga naghimo sang paagi si Sanopao nga makuha ang armas sang suspetsado apang nakadasma ini.
Gilayon naman ini nga gintiro sang suspetsado sang makaduha ka beses nga nag-igo sa nawala nga bahin sang dughan.
Ginkompronta man ini gilayon ni Roberto Sanopao Sr, amay ni Roberto Jr., kag ginlabo sang patalom nga nag-igo sa natuo nga bahin sang lawas ni Baynosa.
Tiruhon man ini kuntani sang suspetsado apang wala maglupok ang armas, gani gilayon nalang ini nga nalagyo kag nagpanago sa wala mahibaluan nga direksyon.
Ginadala ang mga biktima sa ospital apang gindeklarar nga dead on arrival.
Suno kay Indiape, ginatan-aw nga tripping ang pagpangluthang.
Sa karun, padayon pa ang imbestigasyon kag pagpangita sang mga kapulisan sa nakapalagyo nga suspetsado.
