Ginakasubo sang ciudad sang Talisay, Negros Occidental ang pagpatay sa isa nila ka empleyado kag ginakondenar sang alkalde sang ciudad ang nasambit nga hitabo.
Ginkilala ang biktima nga si Mike Lumawag, 45 anyos, nagatrabaho sa Talisay City Treasurers’ Office.
Madumduman nga ang biktima ang nagdul-ong sa iya anak para sa swimming lesson kag nagpauli.
Pag-abot sa ila nga balay, may nagtiro sa likod sang iya nga salakyan gani ini nanaog kag nagdalagan pasulod.
Ginlaot pa ini sang suspek sa sulod sang ila balay kag ginluthang.
Nabatian ang apat ka lupok sang armas-luthang kun sa diin nag-agom sang igo sa liog kag ulo ang biktima.
Suno sa amay sang biktima, PWD si Mike bangud nabudlayan ini nga makabati kag natalana pa kuntani magbakal sang hearing aid.
Sa interview sang Bombo Radyo Bacolod kay Atty. Jose Jonathan Ealdama, Talisay City Administrator, nagapadangat ang mga ini sang pagpakig-unong sa nalisdan nga pamilya.
Suno kay Ealdama, gincontact na ni Talisay City Mayor Niel Lizares ang Talisay City Police agud nga tutukan ang imbestigasyon sa kaso nga pagpatay kay Lumawag agud nga mahatagan sang hustisya ang kamatayon sang biktima.
Ginpasiguro man sini sa mga pumuluyo sa ciudad sang Talisay nga ang mga kapulisan kaupod ang local government unit ang mangin vigilante na.
Suno diri gaamat amat na install ang ciudad sang CCTV cameras kag mga suga agud mangin masanag ang ciudad kag malikawan na ang pagluntad sang indi maayo nga hitabo sa ciudad.
Samtang padayon pa ang imbestigasyon sang Talisay City Police Station sa kaso kag ginatumod pa ang motibo kasubong man ang suspek nga nagpatay sa biktima.
