Ginkondenar sang obispo sang Diocese of San Carlos diri sa Negros Occidental ang pagpatay sa human rights activist nga si Zara Alvarez sa syudad sang Bacolod sang Lunes sang gab-i.
Madumduman nga nagbakal sang sud-an kag papauli na kuntani si Alvarez sa iya nga boarding house sang ginluthang ini sang wala pa nakilal-an nga suspetsado.
Sa interview sang Bombo Radyo Bacolod kay Bishop Gerardo Alminaza, ginkumpirmar sini nga updanay sila ni Alvarez sa pagpakigabato sa extra judicial killings sa probinsya.
Suno kay Alminaza, isa ka single mother si Alvarez kun sa diin may nailo ini nga isa ka 11 anyos nga bata.
Aminado ini nga nakibot kag nasubuan siya sa natabo kay Alvarez bangud magluwas sa nailo sini nga anak, nadulaan naman sang tingog kag kadampig ang mga ginapigos nga mga mangunguma kag mamumugon.
Ginpahayag man sang obispo nga antes pa man ang natabo, may yara na ini sang nabaton nga mga death threats kag nakaagi man bilanggo si Alvarez apang naacquit man sa kaso.
Suno kay Alminaza, daw kaangay na nga nagakatabo na ang ginakahangaw-an sini angot sa pagpasar sang Anti-Terror Law.
Nagapati man ini nga wala sang tawo nga makautas sang kabuhi nga ginpahulam sang Ginoo sa isa ka tawo nga may sala.
Dugang pa sini, dapat ginpaagi sa due process kun may sala gid man si Alvarez kag gintugyan na lamang sa husgado ang pagpamatbat sa iya.
Nagalaom man ini nga magahatag ang gobyerno sang paglaom sa mga pumuluyo.
