Ginkondenar sang 3rd Infantry Division sang Philippine Army ang kamatayon ni Corporal Mark Anthony Quiocson nga ginpatay sang ginapatihan miyembro sang New People’s Army sa Barangay Luz, Guihulngan City, Negros Oriental sadtong Hulyo 1.
Sa interview sang Bombo Radyo Bacolod kay 3rd ID spokesperson Army Major Cenon Pancito III, ginpahayag sini nga hugot nila nga ginakondenar ang pagluthang kay Quiocson.
Nahibaluan nga ang biktima ang nagikan sa Community Support Program sang 62nd Infantry Battalion sang 303rd Infantry Brigade sang Philippine Army.
Suno kay Pancito, nagaserbe si Quiocson sa COVID-19 Community Control Point kag nagahatag sang bulig sa Barangay Development programs.
Dugang pa sini nga ang papel ni Quiocson amo nga mag-istorya sa komunidad ilabi na sa mga problema kag disgusto nila sa gobyerno.
Nagpasalig naman si Pancito nga hatagan nila sang hustisya ang kamatayon sang suldado kag ila tinguhaan nga mauntat na ang insurhensya sa Negros Island.
Madumduman nga sang Miyerkules, alas-5:00 sang hapon, ginbanggaan sang apat ka wala pa nakilal-an nga mga kalalakihan nga ginapatihan miyembro sang Special Partisan Unit (SPARU) sang NPA ang motorsiklo nga ginadala ni Quiocson kag gintiro ini sang makapila ka beses.
Magluwas diri, ginkuha pa sang mga suspetsado ang issued firearm sang biktima, kwarta, ATM cards kag iban pa nga mga gamit.
