Ginkondenar sang tagpamaba sang Bacolod City Police Office ang ginhimo sang police nga pagpatay sa mag-iloy sa Paniqui, Tarlac santo sa nagalapta nga video sa social media nga kuha man sang natabo ini sang Domingo.
Sa interview sang Bombo Radyo kay Police Lt. Col. Ariel Pico, indi sini mabasol ang mga pumuluyo nga magpagwa sang kainit matapos nga malantaw ang video sang ginhimo sang police bangud ini nagakaangay.
Suno kay Pico, nakadepende na sa desisyon sang korte ang matabo sa police bangud napasaka naman ang kaso batok diri.
Ginapangamuyo man sini kaupod ang BCPOcity director nga indi ini masulit bangud sa tion nga matabo ini, magapangatubang ang police ang tangkas-tangkas nga kaso.
Nasubuan man ini bangud sa natabo nagbalik naman sa puno ang paglantaw sang mga pumuluyo sa mga kapulisan.
Masami man sini ginapahanumdom sa mga kapulisan sa BCPO nga ang paghimo sang desisyon ang dapat igasanto sa mission, vision kag sa objective bilang police.
Ginpahayag man ni Pico nga ang pagdala sang armas sang mga nakaoff duty nga police ang isa lamang ka pribelihiyo nga ginhatag sa ila bangud mahimo man sila makaresponde ingkaso nga may dapat respondehan.
Suno pa diri, dapat respetuhon sang police ang tawhanon nga kinamatarong sang tawo kag ang kabuhi sang tawo ang dapat una sa prayoridad sang police.
Dako man nga sala para kay Pico ang ginhimo sang police sa Tarlac.
Isa man sa masami sini nga ginapahanumdom sa mga police sa syudad nga sa tion nga magresponde ibutang sa paminsaron ang maximum tolerance kag malawig nga pasensya.
Nagapasalig man ini nga wala sang matabo nga pareho sini nga insidente sa Bacolod City Police Office.
