Ginatun-an sang Sangguniang Panlungsod sang Bacolod ang pagpatigayon sang virtual session agud indi na sila magpadulong sa Bacolod Government Center.
Madumduman nga temporaryo nga ginlockdown ang BGC rason kun ngaa wala nakapatigayon sang session ang SP kahapon.
Sa interview sang Bombo Radyo kay Vice Mayor El Cid Familiaran, ginpahayag sini nga ila ginatun-an ang option nga magpatigayon sang virtual session agud indi na kinahanglan magpadulong pa sa BGC ukon magwa sa ila mga puluy-an.
Suno kay Familiaran, possible nga dasun nga Miyerkules, ila ini testingan.
Suno diri, wala man sang dako nga isyu nga kinahanglan talakayon ang SP apang aminado ini nga isa ka problema ang temporaryo nga pag-untat sang pagbaton sang out-patient kag pagsira sang pila ka mga operasyon sa Corazon Locsin Montelibano Memorial Regional Hospital.
Gindugang man sini nga madamo gihapon sang nagakadakpan sa operasyon sang Task Force Disiplina sa ciudad.
Gani nagapanawagan ini sa mga Bacolodnon nga indi na magsagad pasaway kag magkooperar na lang bangud indi basta-basta nga kontra ang COVID-19.
