Plano karon sang ciudad sang Bacolod nga himuan sang ordinansa ang fireworks display kada New Year kag magpatigayon sang programa kada Paskwa.
Sa interview sang Bombo Radyo Bacolod kay Vice Mayor El Cid Familiaran, ginpahayag sini nga luyag nila nga i-institutionalize ang fireworks display bangud nakita nila nga nag-triple ang numero sang mga tumalan-aw sini nga tuig.
Suno diri, maayo man ini nga programa bangud malikawan pa ang mga firecracker related incidents kun magtambong nalang ang publiko sa isa ka community fireworks display.
Magluwas diri, magaplano man sila sang mga aktibidad nga hiwaton kada Paskwa
Samtang, ginalantaw naman ni Familiaran nga mas mangin maayo nga tuig ang 2020 sa ciudad sang Bacolod.
Suno diri, madamo sang mga investments ang nagahulat sa ciudad apang dako nga pagpanghangkat lamang amo ang problema sa basura.
Naga-apelar naman ini sa publiko nga magbuligay ang tanan ilabi na sa pag-segregar sang basura agud indi madugangan ang problema sang ciudad.
Nagpasalig man ang bise alkalde nga hugton nila sini nga tuig ang “no segregation, no collection policy”.
