Ginpahayag sang chairman sang Committee on Transportation sa Sangguniang Panlungsod nga wala nangin madinalag-on ang panawagan sang mga transport group sang sila nagtipon sa Bacolod City Government Center agud ipalab-ot sa alkalde sang ciudad ang ila mga sentimiyento sang Mayo 8.
Sa interview sang Bombo Radyo kay Councilor Al Victor Espino, matapos ang isa ka adlaw nga transport strike kag rally sang mga transport group, wala man ini sang epekto sa siyudad kun sa diin padayon man sa gihapon ang byahe sang mga transport vehicles.
Suno diri, nagapanaog pa lamang ini sa city hall, nagasinggit na ang mga ini nga siya ang dapat magresign sa pwesto bangud wala ini sang inubrahan kag dapat magbalik na lamang sa Victorias City si Mayor Alfredo Benitez bangud wala ini inubrahan sa ciudad.
Apang, ginpainitndi sini sa mga drayber kag operators nga indi ang Local Government Unit ang dapat nila nga padangatan sang reklamo kundi ang Land Transportation Franchising and Regulatory Board.
Ini ang iya ginpa-athag sa mga draybers kag operators apang nagapakuno-kuno pa ang mga ini nga wala sila nakaintindi.
Liwat man sini nga gin-athag nga wala sang kamatuoran nga nagapamatok ang siyudad nga sila makarenew sang provisional authority.
Suno kay Espino ang pagphase-out sang traditional jeepneys ang ipatuman gid sang national government.
Sa karun, indi magnubo sa 500 units ang nagabyahe nga Modernized jeep sa siyudad.
Lauman naman nga may maga-abot nga bag-o nga unit sang modernized jeepneys ang maga-abot subong nga Mayo kag sa masunod nga bulan tubtob makumpleto ang gina-require nga 1,200 units.
