Nagapadayon ang pagpatuman sang drainage master plan sa syudad sang Bacolod.
Sa interview sang Bombo Radyo Bacolod kay Bacolod City Lone District Congressman Greg Gasataya, isa sa pinakadako nga ginapatigayon nga proyekto amo ang ginaubra nga diversion channel sa reclamation area kun sa diin nanub-an nga bahin sang syudad bangud yara ini sa baybay.
Suno kay Gasataya, indi supisyente ang nagaexister nga drainage system kag ang sapa sa reclaimation area kun sa diin ginalikawan sang tubig nagikan sa nabukid nga portion sang syudad gani kinahanglan nga magubra sang dugang nga mailigan ang tubig.
Magluwas sa nasambit nga proyekto, may ginahimo man nga mga drainages ukon water channels sa pila ka bahin sang syudad nga ginapatuman sang Department of Public Works and Highways (DPWH) bilang kabahin sang drainage master plan sang syudad.
Nagalaom si Gasataya nga dako ang mabulig sang nasambit nga proyekto sa nagapadayon nga programa sang national government sa syudad sang Bacolod.
Ginpaathag man sini nga may yara sang flood wall ang sa Magsungay sa bahin sang Gaisano City Bacolod kasubong man sa Barangay Pahanocoy apang nag-awas ini gani nagtuga sang pagbaha sa lugar sang tinalikdan.
Ginpahayag man sini nga madamo man sang factors kun ngaa nagaluntad ang pagbaha sa syudad sang Bacolod kag isa diri ang pagclog sang manhole, ini kasunod sang pagtsekyar sang personnel sang DPWH.
