Ginahulat na lamang sang Bacolod City National High School ang pag-aprubar sang division office sang Department of Education nga magpatuman sang half day class bangod sa tuman ka init.
Sa interview sang Bombo Radyo Bacolod kay Richard Gelangre, principal sa Bacolod City National High School, mapa gwa pa lang ini sang memorandum sa tinutuyo nga magpatuman sang half day class humalin alas 7:00 sang aga tubtob alas 12:20 sang udto.
Suno diri, ang klase ang patigayunon lamang sa sulod sang 40 ka minutos kada subject samtang ang klase naman sa hapon, ang posible nga patigayunon pamaagi sa online class ukon ang mga activities sang kabataan ang padayunon na lamang sa ila tagsa ka mga panimalay.
Ginapahanugotan man ang mga estudyante nga magsuksok sang PE uniform ukon white t-shirt kumpara sa school uniform nga mainit kun susksokon, apang dapat nga nagasuksok sang ID ang estudyante.
Sa mga manunudlo naman, mahimo man nga indi na mag uniform kag magsuksok na lamang sang t-shirts sang buluthuan kag DEPED.
Pahayag ni Gelangre, ang pagpatuman sang half day class ang para man malikawan ang sakit nga dala sang tuman ka init, kaangay na lamang sang nosebleed kag heart attack.
