Tun-an pa kun dayunon ang pagpatuman sang duha ka adlaw nga signal jamming sa highlights sang Bacolod Masskara Festival 2024.
Sa interview kay Councilor Jason Villarosa, chairperson ang Committee on Tourism sa Sangguniang Panlungsod, nagrequest na ang Bacolod City Police Office (BCPO) kun mapatuman ang signal jamming halin alas-7:00 sa aga tubtob alas-4:00 sa hapon sa Oktobre 26 kag alas-12:00 sa udto tubtob alas-7:00 sa gab-i sa Oktobre 27 sa mga natalana nga festival sites.
Suno sa konsehal, kun siya ang masunod indi ini komporme sa signal jamming bangod mabudlay para sa mga festival goers ang pag-update sa pamilya, wala sang paagi sa komunikasyon ang mga magalagaw sa kapiestahan partikular na ang mga turista nga indi kabisado ang ciudad kag indi man makapatigayon sang live coverage ang mga media.
Apang aminado ini nga magakinahanglan pa sang konsultasyon gikan sa alkalde kag sa nagkalainlain nga mga ahensya.
Gindumdom sini nga si First Lady Liza Araneta Marcos mismo ang nagpa-untat sang implementasyon sang signal jamming nakaligad nga Masskara bangod ini mismo ang nakabatyag sang kabudlayan sa komunikasyon.
Dugang pa nga imbes nga ang festival site lamang ang wala sang signal, madamo sang lugar nga nagaka-apektuhan kun sa diin tinalikdan nga tuig, nagdangat pa tubtob sa Talisay City.
Ang Grand Salubong para sa Bacolod Masskara Festival 2024 ang natalana sa Oktobre 11.
Samtang pito naman ka Barangay ang naqualify para sa Street Dance and Arena Competition nga ginalakipan sang defending champion nga Barangay Granada, Barangay Bata, Barangay 6, Barangay 12, Barangay 18, Barangay 21 kag Barangay 35.
12 ang Barangay nga nagsignify nga luyag magpasakop apang ang iban ang wala nakapasar bangod wala pa nakakumpleto sang liquidation sang nakaligad nga gastos.
Ang tagsa ka Barangay nga magapasakop ang makabatun sang financial subsidy nga P700,000.// Napulo naman ang nakapasar para sa Electric Masskara.
