Magasugod na subong nga adlaw ang Bacolod Traffic Authority Office (BTAO) sa pagpahamtang sang mga signages nga magapahanumdom nga sila ang magapatuman na sang towing kag clamping ordinance sa mga naga-illegal parking.
Sa interview sang Bombo Radyo Bacolod kay BTAO Head Police Major Junji Liba, importante nga makapatigayon sang information drive bilang pahanumdom sa mga motorista nga sila ang magasugod na sa pagpangdakop.
Magluwas sa signages, may magalibot man nga BTAO personnel nga magapanghatag sang ticket sa mga violators.
Apang paathag ni Liba nga ang ticket ang magaserbe lamang nga warning kag wala pa ang mga ini sang bayaran nga penalidad.
Suno diri, ang implementasyon sang towing kag clamping ordinance sa mga nagabuhat sang illegal parking.
Paathag ni Liba nga madugay na nga nakumpleto sang third party contractor ang towing vehicle kag 50 ka mga clamping equipment apang naatrasar lamang ang implementasyon bangod ginhuman pa ang Memorandum of Agreement (MOA) sa tunga sang 3rd party contractor kag Bacolod City Government.
Una nga patigayunon ang implementasyon sa dalan Lacson kag mahimo nga matapos sang Masskara festival, magapatuman naman sini sa dalan Araneta.
Paathag sang BTAO Head nga mga major roads anay ang ila nga target para sa pilot implementation kag kadungan sa pag-angkon sang nagakaigo nga tawo kag equipments, ini ang amat-amat naman nga ipatuman sa iban pa nga mga dalan sa syudad.
Magluwas sa mga main roads, sila ang makapatigayon man sang towing kag clamping sa mga nagapark sa mga lugar nga may signages nga “NO PARKING”.
Suno kay Liba, ang mga violators sang illegal parking nga maclamp ang salakyan ang issuehan sang citation ticket kag ini ang sarang man nga mabayaran on the spot, kag dapat lamang nga pangayuan sang resibo.
Apang kun indi makabayad ukon wala ang vehicle owner, ang salakyan ang sarang nga I-tow kag ma-impound.
Paathag ni Liba nga lain ang bayad sa clamping kag lain man ang balayran sa towing nga may ara sang rate nga kada 4km kag dugang nga presyo sa succeding kilometers samtang may-ara man nga impounding fee.
Magluwas sa balayran sa towing kag clamping, lain pa ang balayran sa City Legal Office sang Bacolod City Government.
Nagapati si Liba nga makaligad sang kapin duha ka bulan nga implementasyon, maganubo naman ang violators kag ang mabilin na lamang nga magakaladakpan amo ang mga matig-a ang ulo nga mga motorista.
