Ginsuspendi naman sang Maritime Industry Authority (MARINA) until further notice ang pagpauli sang pila ka mga seafarers bangud sa pila ka mga ginatalakay nga mga butang kaangay sang mga nangin reactive sa ginpatigayon nga rapid test sang probinsya bangud nagpaidalom man ang mga ini sa rapid diagnostic test antes pa maghalin sa Manila kag wala pa mapat-od kun san-o ang petsa sang pagpauli sang mga ini.
Suno kay Dr. Zeaphard Gerhart Caelian, pinuno sang Provincial Disaster Management Program Division (PDMPD, pat-ud nga may yara sang masunod nga trip para sa mga seafarers.
Ginalauman man nga maga-abot sa Mayo 4 ang ka 17 local Negrenses nagikan sa Palawan.
Magapaidalom man ang mga ini sa 14 ka adlaw nga mandatory quarantine, kuhaan sang swab test para sa polymerase chain reaction (PCR) test kag ang pagasakyan sang mga ini ang Montenegro Lines.
May yara naman sang 20 ka mga estudyante sang University of the Philippines (UP) Visayas.
Sa karun, ginahulat nalang ang clearance nagikan sa city government nga iga-isyu man ni Mayor Evelio “Bing” Leonardia nga pasugtan ini nga makasulod sa Bredco port kag nacommunicate ang clearance nga nagikan sa provincial government sang Negros Occidental.
Ginpasalig sang humanitarian cluster sang Negros Occidental nga nagahalong ang probinsya sa pagbaton sang mga overseas Filipino workers nga nastranded sa Metro Manila.
Nahibaluan nga nakasulat sa letter nahanungod sa pagpahanugot sa pagpauli sa mga seafearer nga nakapaidalom na sila sa rapid antibody test antes magsaka sa barko.
Suno kay Dr. Zeaphard Gerhart Caelian, head sang Negros Occidental Disaster Risk Reduction and Management Office, indi pagpahanugutan nga makasakay kag makapauli ang magareactive sa rapid test.
Suno kay Caelian, bisan ang OWWA sa probinsya ang nakibot man sa gulpyada nga pag-abot sang mga seafarer.
Samtang, ginakumpirma naman sang MARINA nga nakapaidalom sa rapid test sang coast guard kag DOH ang mga nagpauli nga seafarer.
Apang sang ginpangayu-an ang mga seafearer sang resulta sang test, sertipiko lamang ang ila ginpakita nga nagapamatuod nga nakatapos na sila sa 14-day quarantine.
Samtang bangod naman sa natabo sa Iloilo nga may nakasulod nga OFW nga positibo, ginsiguro sang probinsya nga himuon sini ang tanan nga mahimo, agud nga maproteksyunan ang mga pumuluyo, kasubong man ang mga naga-abot nga OFWs kag seafarers.
