Ginkompirmar sang pinuno sang Department of Social Services and Development nga naatrasar ang pagpauli sang mga Badjao sa Jolo, Sulu.
Sa interview sang Bombo Radyo Bacolod kay Pacita Tero, padayon ang ila koordinasyon sa Office of the Civil Defense bangud indi pa magbaton ang Local Government Unit sang Jolo, Sulu bangud sa natabo nga pagpamomba sang damlag lang.
Aminado man si Tero, nga ginaululuhan niya lang ang mga Badjao bangud nakita na sini nga natak-an na sila magtinir sa DSSD Facility kag luyag na nila makagwa.
Nagabais na ang mga ini sa DSSD kag ginapamilit nga may yara sang nakapauli sa Jolo nga mga kaupod nila.
Naghimo man ini sang tikang agud mapapati ang mga Badjao nga wala pa sang nakapauli nga mga upod nila kag gintawgan ang alkalde sang Jolo agud ipabati sa ila nga wala sang nakapauli agud mahatagan ang mga ini sang assurance.
Ginapaintindi man sila ni Tero nga maghulat lang bangud indi pa makasulod sa Jolo kag indi man magrisgo ang coast guard sa pagdala sa ila agud nga madul-ong sila sa nasambit nga lugar.
Aminado man si Tero nga mabudlay ang paghandle sa mga Badjao apang ginahimo sini ang iya masarangan agud nga mahim-os sila.
Wala man ang syudad nagpabaya sa pagtatap sa ila bangud ginahatag ang ila luyag kasubong sang balinghoy kag harina.
Dako man ang posibilidad nga makapauli ang mga ini bangud may yara na sang travel authority.
