Wala nadayon nga makapauli sa Negros Occidental ang 62 ka mga Negrense nga stranded sa Manila nga nakatalana kuntani magpauli sa probinsya kahapon.
Suno kay Governor Eugenio Jose “Bong” Lacson, wala makasakay sa eroplano ang mga stranded Negrenses bangud nag-require ang Inter-Agency Task Force for the Management of Emerging Infectious Diseases sang IATF clearance nga wala man sadto ginpangayo.
Suno sa gobernador, yara na sa sulod sang Cebu Pacific nga bus sa airport ang mga stranded Negrenses kag nagahulat nalang kuntani sang ila scheduled flight.
Wala na nakahingagaw pa ang mga ini sa eroplano kun sa diin ala-1:30 sang hapon ang scheduled flight bangud kinahanglan na sini nga nga maglakat bangud may yara ini sang dala nga cargo para sa probinsya.
Nahibaluan nga alas-3:00 na sang hapon gin-issue ang nasambit nga clearance.
Nagpangayo sang pasaylo si Lacson bangud sa natabo.
Sa data sang probinsya, may yara sang kabug-usan nga 1,408 ka mga Negrense nga stranded sa nagkalain-lain nga lugar sa pungsod.
867 diri ang nagikan sa probinsya samtang 641 naman ang naghalin sa ciudad sang Bacolod.Samtang, nagpanawagan ang gobernador sang Negros Occidental sa mga ospisyales sang mga barangay nga nahamtang malapit sa mga coastal areas nga mag-activate sang bantay dagat agud nga makabulig sa Philippine Coast Guard.
Sa interview sang Bombo Radyo kay Governor Eugenio Jose “Bong” Lacson, ginpahayag sini nga may yara sang nagdangat sa iya nga report nga may mga movements sang mga pump boats ukon fishing vessels nagikan sa Cebu kag Panay pasulod sa probinsya.
Suno kay Lacson, ang nasambit nga mga pump boats ang may dala nga mga pasahero.
Gani naga-apela ini sa mga opisyales sang mga barangay nga nahamtang malapit sa coastal areas nga ilakip sa ila monitoring ang mga illegal entries sang nasambit nga mga salakyan.
