Gin-athag sang pinuno sang Negros Occidental Provincial Environment and Natural Resources Office (PENRO) nga may dako nga epekto sa biodiversity sang suba ang ginhimo nga pagpaminta sang bato sa riverbank sang Asia river sa Brgy Minoyan, Murcia.
Sa interview sang Bombo Radyo Bacolod kay PENRO Head Engr. Joan Nathaniel Gerangaya, ang mga kasapatan kag insekto sa suba ang nagpinalagyo matapos nga gulpyada naglain ang ila nga natural habitat.
Sa pihak sa pasalig sang Russian National nga si Ivan Orlov nga ibalik nila sa original state ang Asia River, ini ang kinahanglan gihapon nga mahatagan sang penalidad bangod ini ang nakakomiter sang bayolasyon.
Sa pagkadumdom sini, nakapagkit sa Anti-Vandalism Law nga ang pagkomiter sang First Offense ang may penalidad nga P5,000 kag ini ang dapat marestore.
Dapat nga isupervise man sang mga opisyales sang Barangay Minoyan ang restoration process agud makaseguro nga wala sang may malapas nga environmental law.
Ang tag-iya ang ipatawag pa sang Barangay, agud matumod kun ini ang may nakuha nga permit kag kun may-ara sang probable cause.
Ginalantaw sini nga bisan mapalos ang pinta sa mga bato, may kaso gid nga pangatubangon si Orlov.
Ginapanugyan man nila nga samtang ginapatigayon ang restoration, magbutang sang net sa ibabaw kasubong man sa idalom nga bahin sang Asia river, bangod ang tubig sa suba ang nagasulod sa Mambukal Resort kasubong man konektado sa Bago River.
Hinali nga may matabo nga fishkill, ginalantaw ni Gerangaya nga mahimo mabasol pa sa contamination nga natuga sang pinta.
Sa pihak sini, ginpasalig man sa ila sang caretaker sang Nursery 1 Incorporated nga water-base kag non-toxic ang gingamit nga pinta.
Aminado si Gerangaya nga wala gid kuntani sang problema sa rennovation kun kutob lamang sa propedad sang Russian national.
Apang ini ang naka-angkon sang problema sumugod sang gintandog na ang mga bato sa suba.
