Ginakabig ni Bacolod City administrator Em Ang nga welcome development ang pag-prayoridad sang national government sa ciudad sang Bacolod para sa distribusyon sang coronavirus disease 2019 (COVID-19) vaccine kun mangin available na ini sa pungsod.
Madumduman nga kahapon ginpahayag ni vaccine czar Secretary Carlito Galvez Jr. nga lakip sa mangin prayoridad nga mga lugar amo ang National Capital Region, Cebu City, Davao City kag Bacolod City bangud sa mataas nga numero sang COVID-19 cases sa nasambit nga mga area.
Sa interview sang Bombo Radyo Bacolod kay Ang, ginpahayag sini naka-istorya na sila ni Mayor Evelio “Bing” Leonardia kun sa diin ila ginhambalan nga dapat preparahan man sang city government ang pagbakal sang bakuna.
Suno kay Ang, naghatag na sang instruction ang alkalde sa budget officer sang ciudad nga magpangita sang pondo nga pwede gamiton sa pag-procure man sang COVID vaccine.
Paathag sini, magluwas sa bakuna nga ialokar sang national government sa ciudad, magapa-in pa gid sang pondo ang city government para diri.
