Gintindugan sang Alliance of Concerned Teachers – Negros Island Negros Union nga ang rasun sa pagprenda sang mga manunudlo sang ila ATM cards ang bangod sa magamay nga sweldo.
Ini kasunod sang liwat nga pahanumdom sa provision nga nagadumili sa mga public school teachers nga magprenda sang ATM.
Sa interview sang Bombo Radyo Bacolod kay ACT-NIR Unior Secretary General Grace Abellar, aminado ini nga indi gid man maayo ang pagprenda sang ATM ukon pag-utang, apang wala man sang mahimo ang manunudlo bangod sa kakulang sang sweldo.
Nagapati ini nga yara sa 70 porsyento sang mga manunudlo ang nagapangutang agud lamang may magamit sa pang-adlaw adlaw.
Panindugan ni Abellar nga indi lamang bangod sa financial management issue ang rasun sa pagprenda sang mga manunudlo sang ATM, kundi bangod sa kakulang sang sweldo.
Bangod sa masami ang limpyo nga sweldo nga mapauli sang mga manunudlo ang yara na lamang sa P5,000.
Ini ang mabudlay na para sa nagaisahanon sa kabuhi, gani mas mabug-at pagid ang sitwasyon sang mga manunudlo nga may ginabuhi nga pamilya ukon single apang bread winner sa ila panimalay.
Dugang pa sini nga ang mga manunudlo pa ang masami nga nagagastos sa kakulangan sang suporta sang gobyerno, kun sa diin sila ang nagagamit sang kwarta gikan sa ila mga bulsa para sa kaayuhan sang pagtudlo, kag mga estudyante.
Para sa ACT-NIR, ang concern sang gobyerno indi ang kaayuhan sang teachers, kundi ang matinluan ang ila imahen.
Ginadumili sang mga ini ang pagprenda sang ATM nga amo na lamang ang dalangpan kun kis-a sang mga manunudlo nga ginakulang, agud indi makalab-ot sa iban nga pungsod ang kamatuoran nga tuman ka nubo ang sweldo sang mga manunudlo sa Pilipinas.
Panindugan ni Abellar nga madugay na ang panawagan nila nga mahatagan sang disente kag makabuhi nga sweldo ang mga manunudlo, apang sa baylo, kun magsaka ang sweldo sang mga manunudlo ini ang gamay lamang nga haluson nagatupa lamang sa deductions.
Panawagan nila sa gobyerno nga solbarun ang pag-antos sang mga teachers, kag indi nga dugangan pa.
Masakit para sa ila nga kaangay nga bungol ang gobyerno sa panawagan sang mga manunudlo.
